Pieramožcu «Jeŭrabačańnia-2009» uradženca Biełarusi Alaksandra Rybaka abvinavačvajuć u tym, što pahražaŭ raspaŭsiudzić intymnaje videa svajoj siabroŭki. Ale nie ŭsio tak adnaznačna.
Alaksandr Rybak niadaŭna źviarnuŭsia da svaich padpisčykaŭ u tyktoku:
«Hety hod pavinien byŭ być pryśviečany publikacyi novaj muzyki i padrychtoŭcy da hastrolaŭ. Ale zamiest taho, kab skancentravacca na hetym, mnie davodzicca mieć spravu sa stałkierkaj u Łos-Andželesie», — napisaŭ śpiavak.
U kancy vieraśnia stałkierka, pra jakuju pisaŭ Rybak, taksama vystupiła ŭ tyktoku. Joj akazałasia 25-hadovaja Jaŭhienija Skrypnik.
Na svajoj staroncy ŭ hetaj sacyjalnaj sietcy jana abvinavačvaje Rybaka ŭ tym, što jon źniaŭ intymnaje videa bieź jaje zhody i pahražaŭ jaho abnarodavać, a taksama nazyvaje jaje eskortnicaj. Pa słovach Jaŭhienii, jana paprasiła Rybaka vydalić videa i pavažać jaje kanfidencyjnaść.
U inšym videa Jaŭhienija śćviardžaje, što paznajomiłasia z Rybakom bolš jak 12 hadoŭ tamu ŭ Małdovie, adkul jana rodam. Paźniej dziaŭčyna pracavała adnoj z pradziusarak klipa na pieśniu Rybaka «Memories» i, pavodle jaje, arhanizavała źjaŭleńnie Rybaka ŭ dvuch telešou.
Pa słovach Skrypnik, jana źviarnułasia da śpievaka pa dapamohu. 6 sakavika 2023 hoda jany sustrelisia. Padčas sustrečy Rybak, pavodle jaje, vyrašyŭ źniać pryvatnaje videa, na jakim «vidać jaje cieła i hrudzi». Dziaŭčyna abvinavačvaje śpievaka ŭ pahrozach i źniavahach na jaje adras.
5 kastryčnika Rybak vykazaŭsia z nahody abvinavačvańniaŭ na svajoj staroncy ŭ instahramie.
Pa słovach śpievaka, na praciahu hoda jaho damahałasia dziaŭčyna, ź jakoj spačatku jon mieŭ siabroŭskija adnosiny. Rybak «ź niekatorych pryčynach» nie nazyvaje jaje imia i davodzić:
«Kab było jasna, my ź joj byli kalehami i navat siabrami, pierš čym jana zachapiłasia mnoj i pačała hetyja emacyjnyja i fizičnyja damahańni».
Alaksandr Rybak śćviardžaje, što «nikoli ničym joj nie «pahražaŭ». Prosta skazaŭ, što paviedamlu pra jaje ŭ palicyju (što i zrabiŭ)».
Rybak charaktaryzuje dziaŭčynu jak psichična chvoraha čałavieka i adznačaje, što doŭha nikomu nie raspaviadaŭ ab situacyi, bo bajaŭsia, što jana moža nanieści škodu sabie ci kamu-niebudź jašče.
«Ale ciapier, kali jana pačała raspaŭsiudžvać pra mianie čutki ŭ tyktoku, mianie heta bolš nie chvaluje, ja nie mahu zastavacca na miescy. Hetaja žančyna była apantanaja mnoj bolš za hod, a z taho času, jak ja skazaŭ joj u studzieni: «Kali łaska, pierastań sačyć za mnoj», usio stała značna horš», — napisaŭ śpiavak na svajoj staroncy ŭ instahramie.
Alaksandr śćviardžaje, što ŭ jaho «bolš za 8000 listoŭ i paviedamleńniaŭ ad jaje z padroblenych akaŭntaŭ. Jana kaža, što ŭ mianie jość jaje aholenyja videa, što, jak jana viedaje, nie adpaviadaje rečaisnaści. Heta prosta čutki, jakija jana raspuskaje, kab pryciahnuć da siabie ŭvahu».
Na svajoj staroncy śpiavak vykłaŭ videa z kamier biaśpieki, na jakich vidać dziaŭčyna, jakaja znachodzicca ŭ vakolicach jaho domu. Śpiavak śćviardžaje, što zdymki byli zrobleny ŭ dzień, kali dziaŭčyna napałochała jaho nočču ŭ haražy.
«Dziaŭčyna z červienia 2023 hoda maje padpisku ab niavyjeździe i try razy źviartałasia ŭ sud tolki dziela taho, kab pabačycca sa mnoj (zrazumieła, kožny raz prajhravała ŭ sudzie)», — paviedamlaje Rybak.
Niekalki dzion tamu ŭ tyktoku zjaviłasia i novaje videa Skrypnik. Tam jana pryvodzić frahmient svajoj pierapiski z Rybakom za 6 sakavika i śćviardžaje, što padčas sustrečy śpiavak bieź jaje zhody kranaŭ jaje.
U sacyjalnych sietkach ludzi vykazvajuć padtrymku jak Rybaku, tak i Skrypnik.
Čytajcie jašče:
Pieramožca «Jeŭrabačańnia» Alaksandr Rybak aściarožna vykazaŭsia pra padziei ŭ Biełarusi
Ciapier čytajuć
Siłaviki raskazali, jak hrodzienskija błohiery tracili miljon, sabrany nibyta na lačeńnie dziciaci2
Siłaviki raskazali, jak hrodzienskija błohiery tracili miljon, sabrany nibyta na lačeńnie dziciaci
«Narod pamiraje, i balnic nie treba. Hałoŭnaje prezidenckaja i deputackaja!!!». Što ludzi pišuć pra zakryćcio reabilitacyjnaha centra na Homielščynie1010
Kamientary