«Ciapier choć stała možna narmalna zarablać». Što dumajuć taksisty pra pracu ŭ novych umovach
Z 1 listapada rynak taksi žyvie pa novych praviłach. Kolkaść taksistaŭ skaraciłasia pryblizna na tracinu. Praz heta pavialičyŭsia čas čakańnia i taryfy na pieravozku. Pasažyram takija źmieny nie padabajucca, čaho nielha skazać pra taksistaŭ, jakija trapili ŭ rejestr i praciahvajuć pracavać.
Košt pajezdki ŭ siarednim vyras na 30-40%
Arciom, jaki zastaŭsia pracavać u taksi, kaža, što ź listapada košt pajezdki ŭ siarednim vyras na 30-40%. Sam taryf pry hetym nie źmianiŭsia, ale praz zahružanaść čaściej pracuje pavyšany kaeficyjent.
«Pry hetym u pikavyja hadziny taryf vyrastaje ŭ dva razy ŭ paraŭnańni z tym, što było miesiacam raniej», — kaža taksist.
Padobnyja źmieny jamu daspadoby, bo vydatki na toje, kab trapić u rejestr, akazalisia apraŭdanymi.
«Ciapier choć stała možna narmalna zarablać», — kanstatuje taksist.
Pracujučy na ŭłasnym aŭto, raniej mužčyna zarablaŭ u miesiac ad 3300 da 4000 rubloŭ. Ciapier jon spadziajecca, što budzie vychodzić pa 4-5 tysiač rubloŭ.
«Nie mahu skazać, što raniej byli niejkija vialikija terminy prastoju, ale ciapier ich dakładna niama. Zakazaŭ šmat, a mašyn na linii stała prykmietna mienš. Tamu prynamsi ja pakul zadavoleny, choć byvajuć hadziny, kali davodzicca pracavać pa minimalnym taryfie», — kaža Arciom.
«Jašče adzin plus, što taksi pierastajuć karystacca bičy, jakija raniej mahli skinucca pa 1—2 rubli i vyklikać taksoŭku zamiest pajezdki hramadskim transpartam», — dadaje mužčyna.
Adnak surazmoŭca zaŭvažaje, što mašyn pastupova stanovicca bolej.
«Užo ciapier pad kaniec miesiaca naziraju, što mašyny dadajucca, bo ludzi praciahvajuć rehistravacca ŭ rejestry. Niekatoryja vyrašyli pačakać, pahladzieć, ci budzie sens pracavać dalej. Ciapier, kali bačać, što zarobki padraśli, to pačynajuć dumać pra rejestr i viartańnie na liniju niekatoryja z tych, chto kateharyčna byŭ suprać usiaho hetaha».
Mužčyna nie vyklučaje, što nieŭzabavie siaredni košt pajezdki budzie źnižacca.
«Ceny vyraśli mienavita praz deficyt mašyn. Kali jon źniknie, to jany pojduć uniz. Ale nie dumaju, što my znoŭ ubačym tyja samyja ličby, što byli, naprykład, u vieraśni. Bo tyja, dla kaho taksi było padpracoŭkaj, usio adno nie viernucca», — ličyć Arciom.
«Taksi ŭ Biełarusi było nadta tannaje»
Inšy surazmoŭca kaža, što pakul składana acanić, jak novyja praviły hulni adabjucca na prybytkovaści hetaha biznesu.
«U mianie pracujuć niekalki mašyn. Znajści kiroŭcaŭ zaŭždy było składana, asabliva adekvatnych, jakija hatovyja narmalna i pastajanna pracavać. Była vialikaja ciakučka.
Ciapier ža nielha prosta ŭziać čałavieka, kab jon 2-3 miesiacy papracavaŭ i pajšoŭ, bo dla pracy taksistam jon musić adpaviadać usim patrabavańniam i być u rejestry. Heta dadatkovyja vydatki pa časie i finansach. Tamu z pošukam kiroŭcaŭ stała jašče składaniej», — skardzicca Kirył.
Pa jaho słovach, mnohija iduć u taksi, kab «pierakantavacca», pakul nie znojduć lepšuju pracu. Niekatoryja paralelna vučacca na katehoryju SIE, kab potym uładkavacca na furu ŭ Jeŭropie.
Mužčyna ličyć, što dla taho, kab usie zastalisia zadavolenymi, taryf u siarednim musić vyraści minimum na 30%.
«Ciapier uvachod u taksi staŭ bolš składanym i darahim. Minimum, jaki treba ŭkłaści ŭ aŭto, kab jano adpaviadała standartam, — heta 2000-2500 rubloŭ. Padpracoŭščyki, napeŭna, źniknuć jak kłas.
Kali taryf zastaniecca bolš vysokim, to ŭ vyjhryšy akažucca jak uładalniki biznesu, tak i kiroŭcy, bo ŭ apošnich taksama vyraście zarobak. Pa idei, heta pavinna pazityŭna adbicca na jakaści, bo kali zarpłaty ŭ taksistaŭ buduć vyšejšyja, to źjavicca kankurencyja siarod kiroŭcaŭ, ludzi pačnuć daražyć hetaj pracaj.
Banalna nie treba budzie pierapracoŭvać, kab zarabić bolš-mienš hodnyja hrošy. Tamu heta, chutčej, pazityŭnyja momanty. Klijentam, kaniečnie, moža nie spadabacca, što pajezdki buduć kaštavać daražej, ale taksi ŭ Biełarusi, na maju dumku, było nadta tannaje», — kaža Kirył.
Ciapier čytajuć
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2222
Kamientary
Tam žie vrodie napisano, čto on na svojej mašinie jezdit. Značit dla toho, čtoby zarabatyvať eti 4000 jemu prišłoś śpierva vłožiťsia v pokupku avto, kotoroje imiejet svojstvo łomaťsia, iznašivaťsia, a značit jeŝie i tieriať v cienie.
Vdobavok ja nie dumaju, čto on po 40 časov v niedielu rabotajet, čtoby stolko imieť.
A jeśli už vam tak zavidno, to vpieriod i s pieśniej! Pokupajetiet avto, pierieoborudietie dla raboty v taksi i vaši 4k budut u vas