Jak źmieniacca rajon Lebiadziny i zabudova pamiž čyhunkaj i vulicaj Majakoŭskaha

Lebiadziny

Žyły rajon užo sfarmiravany, usie zapłanavanyja damy pabudavanyja, adnak sacyjalnych abjektaŭ nie chapaje. Zabiaśpiečanaść dziciačymi sadami siońnia składaje tolki 59% ad normy, škołami — da niadaŭniaha času była 70%. Tamu detalovy płan terytoryi byŭ skarekciravany z ulikam budaŭnictva nieabchodnych abjektaŭ adukacyi, achovy zdaroŭja i inšych.

Pavodle prajekta, u Lebiadzinym źjaviacca jašče dva sadki. Novaja škoła ŭžo pracuje z vosieni minułaha hoda. U płanach taksama — budaŭnictva palikliniki i jašče niekalkich budynkaŭ z abjektami kulturna-aśvietnickaha i handlova-bytavoha pryznačeńnia.

Dzie źjavicca ŭsio pieraličanaje? Adzin dziciačy sad zapłanavany na vulicy Miastraŭskaj, pobač z žyłym kompleksam «Łazuryt». Ciapier tam volnaja terytoryja. Pobač zastaniecca miesca dla spartyŭnych placovak.

Druhuju daškolnuju ŭstanovu raźmieściać pobač z novaj škołaj, źleva ad jaje na vulicy Iljanskaj. Sprava ad navučalnaj ustanovy płanujecca pabudavać abjekt kulturna-aśvietnickaha pryznačeńnia. Na supraćlehłym baku toj ža vulicy, nasuprać sadka, zareziervavana miesca pad palikliniku na 500 naviedvańniaŭ za źmienu. Pobač z ustanovaj achovy zdaroŭja pakinuty ŭčastki dla dvuch abjektaŭ — handlova-bytavoha i hramadskaha pryznačeńnia. Daškolnyja ŭstanovy i palikliniku miarkujecca ŭźvieści ŭ pieršuju čarhu — da 2028 hoda, astatnija abjekty — da 2033-ha.

Padčas hramadskaha abmierkavańnia žychary prapanavali kankretnaje napaŭnieńnie hetych abjektaŭ.

Tak, u adnym z dvuchpaviarchovych budynkaŭ mohuć raźmiaścicca supiermarkiet, kaviarnia, bar, apteka, zoamahazin, kramy spartyŭnych tavaraŭ, kvietak, adzieńnia, zabaŭlalny centr, fudkort, adkrytaja parkoŭka. U druhim, taksama dvuchpaviarchovym, — bank, sałon suviazi, fitnies-centr, restaran, 2—3 pasty ručnoj aŭtamyjki, inšyja abjekty absłuhoŭvańnia, padziemnaja parkoŭka.

Što datyčycca budučaha budynka pobač sa škołaj, tam, na dumku minčukoŭ, byli b darečnymi dziciačy navučalny centr, studyi — muzyčnaja i vyjaŭlenčaha mastactva, kafe, restaran chutkaha charčavańnia, kinateatr, boŭlinh, spa-centr, basiejn, cir.

Raspracoŭščyki detalovaha płana adznačyli, što prapanovy nie supiarečać pryznačeńniu zapłanavanych abjektaŭ, tamu pažadańni haradžan mohuć być uličany pry raspracoŭcy horadabudaŭničych pašpartoŭ na inviestycyjnyja ŭčastki.

A voś z zaŭvahaj žycharoŭ pra niedachop parkovak kala novaha doma na vulicy Miastraŭskaj členy Rady nie pahadzilisia.

Ahulnaja zabiaśpiečanaść žyłoha rajona miescami dla asabistaha transpartu składaje 120%, što pryblizna na 2000 mašyna-miescaŭ bolš za nieabchodnaje. Prablemy z parkoŭkaj pieryjadyčna ŭźnikajuć z-za spartyŭnych mierapryjemstvaŭ u «Minsk-Arenie», što pryciahvajuć dadatkovyja aŭtamabili. Ale takija situacyi nosiać karotkaterminovy charaktar, ličać u radzie.

Vulica Majakoŭskaha

Havorka idzie pra terytoryju ŭ miežach vulic Dzianisaŭskaj — Majakoŭskaha — Aranskaj — pałasy adčužeńnia čyhunki Minsk — Homiel. Heta zona vysokaščylnaj žyłoj zabudovy, dzie raźmieščany 60 damoŭ, ź ich bolš za pałovu — šmatpaviarchovyja. Tut jość internaty i 25 siadzib, što znachodziacca ŭ asnoŭnym uzdoŭž čyhunki.

Usio šmatkvaternaje žyllo tut zachoŭvajecca, a voś pryvatny siektar, jak i płanavałasia raniej, padlahaje znosu.

Viadoma, što ŭ pierśpiektyvie źjavicca jašče adna pałasa čyhunki ŭ napramku Asipovičaŭ — zachavać siadziby tam nie atrymajecca. Adnak kali raniej na ich miescy mierkavalisia šmatuzroŭnievyja parkinhi, to ciapier uzdoŭž čyhunki praduhledžana vydzialeńnie inviestycyjnych učastkaŭ dla hramadskaj, kamunalnaj, vytvorčaj zabudovy dla abjektaŭ małoha biźniesu. Budučyja budynki pavinny mieć ubudavanyja haražy, kab zabiaśpiečyć patrebnuju kolkaść parkovačnych miescaŭ.

Taksama da znosu pa prajekcie zapłanavany mietaličnyja haražy, što znachodziacca na hetaj terytoryi. Na ich miescy praduhledžvajecca šmatuzroŭnievy parkinh. Ale hetaja pazicyja vyklikała pytańni ŭ členaŭ horadabudaŭničaj rady, bo naŭrad ci znojdziecca inviestar, hatovy źnieści haražy i ŭźvieści taki parkinh. A značyć, namiečanaje moža nie być realizavana. Mahčyma, maje sens pieranieści rašeńnie pra znos masivu haražoŭ na paźniejšy termin. Pry hetym architektary pahadzilisia, što treba pastupova źmianiać daŭno sfarmiravanuju karcinu zabudovy ŭzdoŭž čyhunki. Vyhlad haradskoj prastory, asabliva na ŭjezdach u centr stalicy, pavinien stać bolš pryvabnym.

Što da zaŭvah hramadzian, što pastupili padčas hramadskaha abmierkavańnia prajekta, to ŭ asnoŭnym žycharoŭ cikaviła, kali buduć znosić siadziby na vulicy Nadzieždzinskaj i ci jość inviestar na hety ŭčastak. Na radzie prahučała: niama ŭpeŭnienaści, što ŭdasca źnieści pryvatnyja damy da 2030 hoda, jak zapłanavana. Nie vyklučana, što heta zrobiać paźniej.

U vyniku prajekt rekamiendavany da zaćviardžeńnia z paznakaju bolš dakładnych terminaŭ jaho realizacyi: što płanujecca vykanać u pieršuju čarhu, a što — paśla 2030 hoda.

• 0
• 0
• 0
• 0
• 0
• 0
• 0
• 0