Kvietki, murał i tysiačy prychilnikaŭ. Jak prajšło raźvitańnie z Ozi Osbarnam u jaho rodnym Birminhiemie
Tysiačy prychilnikaŭ Ozi Osbarna sabralisia ŭ jaho rodnym horadzie, Birminhiemie, kab raźvitacca z rok-lehiendaj. Pryvatnaja cyrymonija raźvitańnia projdzie ŭ čaćvier, a ŭ sieradu trunu ź ciełam muzykanta pravieźli pa horadzie ŭ supravadžeńni duchavoha arkiestra, jaki vykonvaŭ pieśni Black Sabbath. Zorku chevi-mietału pravodzili sapraŭdy šumna — pad kryki fanataŭ, jakija skandavali: «Ozi! Ozi! Ozi!», — piša Bi-bi-si.
Maršrut byŭ viadomy zahadzia. Uzdoŭž vulicy Brod-stryt byli ŭstalavany aharodžy, za jakimi sabralisia tysiačy fanataŭ. Ludzi prynieśli da hetaha stychijnaha miemaryjała mnostva zapisak, paštovak i inšych pasłańniaŭ. Haradskija ŭłady abiacajuć, što ŭsio heta pieradaduć siamji Ozi Osbarna.
Adnojčy Ozi Osbarn, kažučy pra płany na svaje pachavańnie, skazaŭ, što nie suprać papury z Džaścina Bibiera, Sjuzan Bojł i We Are the Diddymen, kali heta budzie śviatočna, a nie depresiŭna. Vyhladała heta sapraŭdy śviatočna, a mnohija fanaty apranulisia jak na kancert.
Chacia žałobnaja pracesija pavinna była prajści pa moście tolki kala pieršaj hadziny dnia pa miascovym časie, karespandent BBC Džoš Tranter adznačyŭ, što ludzi pačali źbiracca jašče z ranicy. Užo a siomaj ranicy na moście i pablizu było kala 150 čałaviek, niekatoryja ź ich prynieśli z saboj składnyja kresły.
Siamja Ozi Osbarna, uklučajučy ŭdavu Šeran, vyjšła z mašyny. Jany praviali na moście kala piaci chvilin. Fanaty vykrykvali słovy padtrymki: «My lubim ciabie, Ozi!», «Ozi nazaŭsiody!» i «Šeran, my ciabie lubim!»
U pracesii ŭdzielničali nie tolki Šeran i dzieci, ale i ŭsie ŭnuki Osbarna. Fanaty zakidali kartež kvietkami. Paśla taho, jak kartež prajechaŭ, ludzi vystrailisia ŭ čarhu da mosta: uskłaści kvietki, sfatahrafavacca abo prosta pastajać.
Most — nie adzinaje miesca, dzie ŭźnik stychijny miemaryjał. Fanaty prynieśli kvietki da murała Black Sabbath na vulicy Navihiejšn-stryt, a bar The Crown pub, dzie Black Sabbath upieršyniu vystupali, zakryŭ vokny čorna-biełymi postarami hurta. Ludzi prynosiać kvietki da doma na Łodž-roud, dzie muzykant žyŭ u dziacinstvie.
U horadzie źjaviŭsia novy murał z partretam Ozi Osbarna — na Hrynvił-stryt. U Birminhiemie jość tramvaj, nazvany ŭ honar Ozi Osbarna, i ŭ 2016 hodzie muzykant pryjazdžaŭ na jaho adkryćcio. Hety tramvaj usio jašče kursiruje. Siońnia jaho pryparkavali kala haradskoj biblijateki, mima jakoj prajazdžała pachavalnaja pracesija.
Pradstaŭnica West Midlands Metro (tak nazyvajecca sistema tramvajnych linij Birminhiema) Sofi Elisan adznačyła, što siońnia sumny dzień — ale i mahčymaść adznačyć vielizarny ŭniosak Ozi ŭ rok-muzyku i papularnuju kulturu.
«My hanarymsia tym, što adzin z našych tramvajaŭ nazvany ŭ jaho honar, i całkam darečy, što jon stanie častkaj ciopłaha raźvitańnia horada z adnym ź jaho samych znakamitych synoŭ», — skazała jana.
Džon Koŭł pryjedzie ŭ Biełaruś 15 vieraśnia. Łukašenka, adnak papiaredziŭ: «vialikaj ździełki» nie budzie11
Kamientary