Fłatylija ź nievialikich sudoŭ, na jakoj prychilniki Paleściny na čale z Hretaj Tunbierh źbirajucca znoŭ pasprabavać trapić u Hazu, u niadzielu zrabiła prypynak u Tunisie. Sustrakać fłatyliju Hrety Tunbierh u porcie pobač sa stalicaj Tunisa sabraŭsia vialiki natoŭp, piša Bi-bi-si.
«My ŭsie viedajem, navošta my tut. Za hetym moram izrailskaja mašyna zabojstvaŭ ździajśniaje hienacyd, [pravakuje] masavaje haładańnie», — zajaviła prysutnym 22-hadovaja Tunbierh.
U pačatku červienia Tunbierh z adnadumcami ŭžo sprabavała na jachcie prarvać marskuju błakadu Hazy. Jachta była pierachoplena, usich prapaleścinskich aktyvistaŭ ź jaje, uklučajučy Tunbierh, dastavili ŭ Izrail, a zatym departavali.
Izrailskija ŭłady nazvali tuju sprobu dabracca da Hazy i pryvieźci tudy nievialikuju partyju praduktaŭ čystaj hulnioj na publiku i imitacyjaj akazańnia humanitarnaj dapamohi. Izrail nazyvaje zajavy pra masavaje haładańnie ŭ siektary Haza chłuśnioj.
Pra hoład zajaŭlajuć nie tolki aktyvisty, jak Tunbierh, i kirujučaja ŭ siektary hrupoŭka CHAMAS, ale i, naprykład, padraździaleńni AAN, jakija abvinavačvajuć Izrail u tym, što jon abmiažoŭvaje pastaŭki charčavańnia ŭ Hazu.
Izrail u sakaviku zabaraniŭ pastaŭku charčovaj dapamohi ŭ siektar Haza pa kanałach ustanoŭ AAN i inšych humanitarnych arhanizacyj, zajaviŭšy, što bolšuju častku hetaj dapamohi zabiraje sabie CHAMAS.
Z maja izrailcianie sumiesna z ZŠA zapuścili novy, ułasny miechanizm dastaŭki i raźmierkavańnia dapamohi. Izrailskija ŭłady śćviardžajuć, što cyvilnaje nasielnictva siektara Haza atrymlivaje dastatkovuju kolkaść charčavańnia.
Doŭhi šlach pa Mižziemnym mory
Aficyjna fłatylija, jakaja płyvie ŭ bok Hazy, nazyvajecca «Hłabalnaja fłatylija Sumud» (arabskaje słova «sumud» aznačaje «tryvałaść»). Jana, zhodna z danymi na sajcie hetaj inicyjatyvy, pakul składajecca z 21 nievialikaha sudna.
Jany startavali ŭ paniadziełak z Barsiełony, i častka ź ich dabrałasia da Tunisa, a častka jašče znachodzicca ŭ šlachu.
«Niekatoryja z sudnaŭ fłatylii, jakaja idzie ŭ Hazu, dasiahnuli porta Sidy-Busaid u Tunisie, dzie fłatylija budzie pašyrana, zahružana dadatkovaj dapamohaj, i da jaje dałučycca tuniskaja kamanda», — napisali aktyvisty «Hłabalnaj fłatylii Sumud» u sietcy X.
Pavodle pieršapačatkovych płanaŭ, «fłatylija Tunbierh» źbirałasia dabracca da Hazy ŭžo ŭ siaredzinie vieraśnia, ale ciapier abvieščana, što jana zatrymajecca ŭ Tunisie na niekalki dzion. Ad Tunisa da Hazy — 2300 km moram.
Tunbierh z adnadumcami raźličvajuć, što pa šlachu da fłatylii dałučacca jašče dziasiatki małych sudnaŭ.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie8
Kamientary