«Не на тым баку чалавечнасці». Нетаньяху абвінаваціў лідараў Брытаніі, Францыі і Канады ў заахвочванні ХАМАС
Прэм'ер-міністр Ізраіля Біньямін Нетаньяху абрынуўся з нападкамі на лідараў Вялікабрытаніі, Францыі і Канады, заявіўшы, што яны «фактычна падтрымалі масавых забойцаў, гвалтаўнікоў, дзетазабойцаў і выкрадальнікаў» у асобе ХАМАС, прыстрашыўшы нядаўна Ізраіль санкцыямі за яго дзеянні ў Газе.
У Лондане і Парыжы адказалі, што дастаўка гуманітарнай дапамогі ў сектар павінна быць «масавай і бесперашкоднай», піша Бі-бі-сі.
20 мая лідары гэтых трох краін Кір Стармер, Эмануэль Макрон і Марк Карні асудзілі пашырэнне ізраільскай вайсковай аперацыі ў Газе, назваўшы яе «несуразмернай» і ахарактарызаваўшы гуманітарную сітуацыю ў сектары як «невыносную».
«Мы не будзем стаяць у баку, пакуль урад Нетаньяху працягвае гэтыя абуральныя дзеянні. Калі Ізраіль не спыніць ваенны наступ і не здыме абмежаванні на пастаўкі гуманітарнай дапамогі, мы распачнем у адказ канкрэтныя дзеянні», — гаварылася ў іх заяве.
Пасля гэтага ў сераду Стармер таксама заявіў, што пастанова Ізраіля дапусціць у Газе толькі абмежаваную колькасць гуманітарнай дапамогі з'яўляецца «цалкам недастатковай». Са слоў Нетаньяху, сваёй заявай Лондан, Парыж і Атава фактычна далі зразумець, што яны хочуць, каб ХАМАС заставаўся ва ўладзе ў сектары Газа. Падставай для пятнічных рэзкіх выказванняў Нетаньяху стала забойства дваіх супрацоўнікаў ізраільскай амбасады ў Вашынгтоне, застрэленых на выхадзе з Габрэйскага музея.
Каментуючы гэты напад, Нетаньяху сказаў, што, на думку лідараў некаторых краін-саюзнікаў Ізраіля, ён павінен «адступіць і прызнаць факт далейшага існавання арміі забойцаў ХАМАС». Даўнінг-стрыт пакуль не адрэагавала непасрэдна на заяву Нетаньяху, але нагадала, што брытанскі прэм'ер асудзіў напад у Вашынгтоне.
Раней у пасце на платформе х Кір Стармер назваў забойства супрацоўнікаў ізраільскага пасольства актам антысемітызму, праява якога неабходна выкараняць, дзе б ён ні выяўляўся.
Францыя і Канада таксама асудзілі напад у Вашынгтоне. Але, па словах Біньяміна Нетаньяху, імкненне гэтых краін змагацца з антысемітызмам і іх заклікі да Ізраіля спыніцца ў Газе відавочна супярэчаць адзін аднаму.
«Я кажу прэзідэнту Макрону, Прэм'ер-міністру Кэрні і прэм'ер-міністру Стармеру, што калі масавыя забойцы, гвалтаўнікі, забойцы дзяцей і выкрадальнікі кажуць вам дзякуй, гэта значыць, што вы знаходзіцеся не на тым баку правасуддзя, не на тым баку чалавечнасці, не на тым баку гісторыі», — дадаў ён.
Ізраільскі міністр па справах дыяспары Аміхай Шыклі таксама заявіў, што Стармер і іншыя лідары «падбадзёрваюць сілы тэрору».
Цяпер чытаюць
«Часцей за ўсё жучок ставяць недалёка ад разетак». Як сілавікі праслухоўваюць беларусаў па тэлефоне і ў кватэрах13
Каментары