Сасіскі з тофу, шніцалі з сейтана і іншыя заменнікі мяса ў будучыні атрымаюць іншыя назвы, вырашыў Еўрапарламент. Такую прапанову ўнесла кансерватыўная Еўрапейская народная партыя.
Там лічаць, што паняцці «бургер», «сасіска» або «шніцаль» варта выкарыстоўваць толькі для абазначэння мясных прадуктаў. Мэтай ініцыятывы называюць падтрымку фермераў і абарону спажыўцоў ад блытаніны, піша DW-Belarus.
Некалькі дзён таму гэтую тэму закрануў і канцлер Германіі Фрыдрых Мерц. «Каўбаса — гэта каўбаса. Каўбаса — не веганская», — заявіў кіраўнік урада ў ток-шоу Caren Miosga на тэлеканале ARD. Аднак ён устрымаўся ад далейшых каментароў.
У мясной прамысловасці задаволеныя, але ў рашэння ёсць і крытыкі. «Свет — у агні, а Еўрапейская народная партыя на гэтым тыдні не знайшла нічога лепшага, як уцягнуць нас усіх у дыскусію пра каўбаскі і шніцалі», — абураецца ў размове з DW еўрадэпутатка ад «зялёных» Анна Каваціні.
У адкрытым лісце буйныя гандлёвыя сеткі Aldi Süd і Lidl, сетка рэстаранаў хуткага харчавання Burger King і нават вытворца каўбасных вырабаў Rügenwalder Mühle, сярод іншых, заклікалі парламент ЕС адхіліць ініцыятыву. Спажыўцы лёгка адрозніваюць раслінныя заменнікі ад сапраўднага мяса. Забарона «прымусіць кампаніі выкарыстоўваць незнаёмыя тэрміны, што значна ўскладніць доступ на рынак і запаволіць дынаміку інавацый», — гаворыцца ў дакуменце.
Большасць членаў Еўрапарламента прагаласавалі за забарону выкарыстання пэўных слоў, уключаючы назвы відаў жывёл, для прадуктаў расліннага паходжання. Праўда, цяпер Еўрапарламенту належыць дасягнуць канчатковага пагаднення з усімі 27 краінамі ЕС.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі10
Каментары