«Растае снег, ідзе дождж — мы плывём»: у Віцебску новабудоўлю падтоплівае ўжо другую вясну
Жыхары дома ў новым віцебскім мікрараёне Нікраполле б’юць трывогу: вясной яны не могуць нармальна зайсці ў пад'езд праз тое, што ён падтоплены — бо ўваход на ўзроўні зямлі, а ліўнёвак няма.
Маладая маці з Віцбска, якая падпісана ў тыктоку як Эла Сцяпанава, паказала на відэа, што адбываецца ў іх навабудзе. Увайсці ў пад’езд і застацца з сухімі нагамі амаль немагчыма, бо вада ўсюды.
Жанчына кажа, што такая сітуацыя ў іх ужо другую вясну. Растае снег, ідзе дождж — жыхары пакутуюць ад падтаплення. Бонусам дадаюцца і іншыя праблемы: дах таксама падцякае, і праз гэта рэгулярна адключаюць ліфт. А маладым сем'ям, якіх у новым мікрараёне Нікраполле хапае, гэта ўскладняе жыццё.
Сітуацыя асабліва крыўдная тым, што дом уведзены ў эксплуатацыю менш за два гады таму.
— Хто за гэта будзе адказваць? ЖЭУ ці Віцебскі ДБК, які пабудаваў так пахабна дом, не прадугледзеўшы ліўнёкі? Адсутнічае ганак, вада паступае ў пад'езд. Як вырашаюць праблему? Прыедуць, адпампуюць ваду — і на гэтым усё. А нам з года ў год пакутуй. З'явіцца цвіль. Гэтыя кватэры дасталіся нам далёка не бясплатна. У нас крэдыт на 20 гадоў больш за тысячу рублёў у месяц.
Заканчвае відэа яна рытарычным пытаннем:
— У нашай краіне ўсё для маладых сем'яў. Якім зараз даводзіцца вычэрпваць ваду. І нам так жыць усё жыццё?
Дарэчы, Эла жыве ў трэцім пад’ездзе — у першым і другім такой праблемы няма, бо там ёсць ганкі.
У каментарыях жыхары суседніх дамоў напісалі, што ў іх таксама аналагічныя пытанні ўзнікаюць: «Побач у дамах падтоплівае падвалы, стаіць невыносны смурод у пад'ездах, тыднямі могуць стаяць ліфты. Пісалі калектыўную скаргу, а толку… Яны там адно на аднаго скідваюць адказнасць».
Але нехта з каментатараў паспрабаваў абвінаваціць у тым, што адбываецца, саміх жыхароў дома. Маўляў, трэба было чысціць снег усім дваром, каб такога не было.
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень12
Каментары