Jak vialisia tajemnyja pieramovy Bajdena i Pucina pra vajnu va Ukrainie
U svajoj novaj knizie «Vajna» suśvietna viadomy amierykanski žurnalist Bob Vudvard raskazvaje, jak Bajden daviedaŭsia, što rychtujecca napad na Ukrainu, a taksama pra dramatyčnyja padziei vosieni 2022-ha i pra słovy, jakija Ościn znajšoŭ dla Šajhu.
Kniha «Vajna» suśvietna viadomaha žurnalista Boba Vudvarda, zasnavanaja na sotniach hadzin intervju i źviestkach śpiecsłužb, raskryvaje detali zakulisnaj palityki ŭrada ZŠA ŭ momanty mižnarodnych kryzisaŭ apošnich hadoŭ i vyjdzie z druku bližejšymi dniami. Niekatoryja amierykanskija ŚMI atrymali knihu jašče da relizu i zrabili ź jaje vytrymki.
Jak pieradaje sa spasyłkaj na knihu ahienctva CNN, prezident ZŠA Džo Bajden jašče ŭvosień 2021 hoda daviedaŭsia ad svajoj vyviedki, što Uładzimir Pucin płanuje ŭ lutym 2022-ha napaści na Ukrainu sa 175 tysiačami vajskoŭcaŭ. Hetaja infarmacyja, pa słovach Vudvarda, šakavała Bajdena.
«Heta było b poŭnym varjactvam. Hospadzie Isusie, ciapier mnie daviadziecca sutyknucca z tym, što Rasija pahłynie Ukrainu?» — adreahavaŭ Bajden u kastryčniku 2021 hoda, kali atrymaŭ źviestki pra vajennyja płany Rasii ad CRU, piša Vudvard u svajoj knizie.
Žurnalist, spasyłajučysia na vysokapastaŭlenych čynoŭnikaŭ va ŭradzie ZŠA, śćviardžaje, što Bajden daviedaŭsia pra płany Pucina dziakujučy krynicy z najbližejšaha atačeńnia rasijskaha prezidenta.
Žurnalist adznačaje, što Bajden dvojčy abmiarkoŭvaŭ z Pucinym danyja amierykanskaj vyviedki ŭ śniežni 2021 hoda — spačatku na videakanfierencyi, a zatym u «žorstkaj 50-chvilinnaj telefonnaj razmovie», jakaja, pa słovach Vudvarda, stała nastolki napružanaj i haračaj, što ŭ peŭny momant Pucin «staŭ pahražać jadziernaj vajnoj». Bajden na heta adkazaŭ, što «ŭ takoj vajnie nie budzie pieramožcaŭ».
Potym, kali ŭvarvańnie va Ukrainu ŭsio ž adbyłosia, Bajden, pa infarmacyi Vudvarda, padčas razmovaŭ sa svajoj kamandaj nie saromieŭsia ŭ vyrazach u adras Pucina.
«Hety **any Pucin. Pucin — heta zło. My majem spravu z uvasoblenym złom», — skazaŭ Bajden svaim daradcam u Avalnym kabiniecie Biełaha doma nieŭzabavie paśla pačatku ŭvarvańnia Rasii va Ukrainu, piša Bob Vudvard.
Užo ŭ vieraśni 2022-ha, piša Vudvard sa spasyłkaj na amierykanskuju vyviedku, uźnikła surjoznaja ryzyka jadziernaj vajny: krynicy z Kramla pieradali, što Pucin «nastolki mocna adčajaŭsia z-za ŭłasnych strataŭ na poli boju, što byŭ hatovy nanieści taktyčny jadzierny ŭdar pa Ukrainie».
Urad ZŠA acaniŭ mahčymaść takoha ŭdaru ŭ «vielmi tryvožnyja» 50%, ad čaho Bajden «zahadaŭ vychodzić na suviaź z rasiejcami pa ŭsich kanałach i pryhrazić im biesprecedentnymi nastupstvami za patencyjny jadzierny ŭdar».
U knizie Vudvarda, jak pieradaje CNN, raspaviadajecca pra napružanuju telefonnuju razmovu pamiž ministram abarony ZŠA Łojdam Ościnam i jahonym tahačasnym rasijskim kaleham Siarhiejem Šajhu ŭ kastryčniku 2022 hoda.
Jak śćviardžaje žurnalist, ZŠA tady pryhrazili Rasii tatalnaj izalacyjaj va ŭsich śfierach, u adkaz na što Šajhu zajaviŭ, što nie lubić pahrozy.
«Spadar ministr, ja — lidar samaj mahutnaj armii ŭ suśvietnaj historyi. I ja jašče nie pahražaju», — zajaviŭ ministr abarony ZŠA Łojd Ościn, adkazvajučy Šajhu.
Praz dva dni, kaža Vudvard, užo rasijanie zaprošvali telefonnuju razmovu z ZŠA.
Ministr abarony Rasii Šajhu sprabavaŭ abvinavacić ukraincaŭ u płanach uzarvać «brudnuju bombu», što, na dumku ZŠA, było łžyvaj historyjaj Kramla, jakuju toj chacieŭ vykarystać u jakaści padstavy dla prymianieńnia jadziernaj zbroi pa Ukrainie.
«My vam nie vierym. My nie bačym nijakich prykmiet padobnaha, i śviet heta razumieje. Pierastańcie tak rabić», — ćviorda zajaviŭ Ościn paśla abvinavačvańniaŭ u adras Ukrainy z boku Šajhu.
Heta byŭ, badaj, samy šakavalny momant za ŭsiu vajnu», — paźniej skazaŭ pra hety epizod vysokapastaŭleny čynoŭnik Pientahona Kolin Kal, piša Vudvard.
Bob Vudvard — redaktar vydańnia The Washington Post, jaki atrymaŭ suśvietnuju viadomaść za aśviatleńnie ŭoterhiejckaha skandału, u vyniku jakoha pajšoŭ u adstaŭku amierykanski prezident Ryčard Niksan. Jon aŭtar niekalkich bestseleraŭ. Ličycca, što Vudvard maje ŭnikalny dostup da krynic u vyšejšych kołach amierykanskaha isteblišmientu, a najbolš siensacyjnyja vykryćci žurnalista, niahledziačy na admaŭleńni datyčnych, potym paćviardžalisia.
Ciapier čytajuć
Redaktara niezaležnaj baranavickaj haziety «Inteks-Pres» Janukieviča prysudzili da 14 hadoŭ kałonii, jaho namieśnika Pakalenku — da 12 hadoŭ7
Kamientary
Rasieja z časoŭ Aranžavaj Revalucyi raspalvała nianaviść da Ukrainy, Pucin adkryta nie ličyć jaje krainaj i ludziej asobnym narodam, abiacaŭ źniščyć - i źniščaje. Ale nie, u kanśpirołahaŭ vinny nie jon, treba admaŭlać vidavočnaje i šukać "hłybiej".