Сейшэлы, Інданезія, Егіпет: колькі каштуюць туры ў цёплыя краіны
Паглядзелі, што прапануюць беларускія тураператары і па якіх цэнах. А таксама, колькі каштуюць пералёты на курорты з Літвы і Польшчы.
Фота: pixabay.com
Егіпет — ад 2700 рублёў на дваіх
Традыцыйна самым папулярным і даступным варыянтам для беларусаў з’яўляецца Егіпет. Цана пуцёўкі ў Шарм-Эль-Шэйх на дваіх пачынаецца ад 2700 рублёў — гэта сістэма «ўсё ўключана» і 11 начэй у гатэлі. Апошні, дарэчы, трохзоркавы і месціцца на трэцяй берагавой лініі.
У сярэднім адпачынак у Егіпце абыдзецца ў 3500 на дваіх чалавек, калі абіраць першую берагавую лінію і гатэль ад чатырох зорак. Тэрмін падарожжаў складае 11 дзён, бо напрамую залежыць ад чартараў «Белавія», якія працягваюць лятаць у гэтую цёплую краіну.
А што наконт рэйсаў з Вільні ці Варшавы? На жаль, лаўкосты ў Егіпет не лятаюць ні з Польшчы, ні з Літвы, без некалькіх перасадак не патрапіць і на рэгулярных рэйсах. Квіток Варшава — Шарм-Эль-Шэйх каштуе ад 70 еўра, але ў дарозе прыйдзецца правесці ад 13 да 17 гадзін. Паляцець на егіпецкі курорт з Вільні каштуе на некалькі еўра даражэй, а дарога зойме ад 9 да 14 гадзін — таксама з адной перасадкай.
ААЭ: тыдзень у Дубаі — 9 тысяч рублёў
Працягласць адпачынку ў Эміратах — тыдзень, бо чартары з Мінска лётаюць часцей, чым у Егіпет. Такая паездка абыдзецца мінімум у 4500 рублёў на дваіх — таксама паводле сістэмы «ўсё ўключана» і з пражываннем у трохзоркавым гатэлі ў Шарджы.
Калі абіраць сярэдні варыянт з гатэлем на першай берагавой лініі, то трэба заплаціць ад 5500 рублёў. А калі хочацца менавіта ў Дубай, то варта арыентавацца на 9000 і больш на дваіх за тыдзень.
Цана прамога пералёту ў Эміраты з польскіх Катавіцэ і Кракава пачынаецца ад 158 еўра на чалавека ў адзін бок. З Вільні прамых пералётаў няма, квіток з адной перасадкай абыдзецца мінімум у 182 еўра, дарога зойме ад 8 гадзін.
Сейшэлы: доўгая перасадка і завоблачныя цэннікі
Наступны прыпынак — Сейшэльскія астравы, паездку на якія могуць дазволіць сабе далёка не ўсе. Мінімальны цэннік ад беларускіх турагенцтваў — амаль 13 000 рублёў на дваіх, і гэта яшчэ са зніжкай. У цану ўключаныя пералёты з перасадкай у Стамбуле, пражыванне ў трохзоркавым гатэлі, сняданкі.
Прамых рэйсаў на астравы з Літвы і Польшчы таксама няма. Найтаннейшым будзе квіток з польскага Катавіцэ — ад 268 еўра на чалавека ў адзін бок. Цана квітка з Вільні пачынаецца ад 366 еўра. У абодвух выпадках патрэбна перасадка ў Стамбуле.
Тайланд: сярэдняя цана — 12-13 тысяч
Туры ў Тайланд пачынаюцца ад 11,5 тысячы рублёў за дваіх — гэта адпачынак на 7 начэй у трох— і чатырохзоркавых гатэлях у Пхукеце са сняданкамі або без харчавання. Пералёт — з перасадкай у Стамбуле. У залежнасці ад таўшчыні кашалька пуцёўкі можна выбраць розныя: ажно да 80 тысяч рублёў, але сярэдняя добрая цана 12—13 тысяч.
З Польшчы і Літвы спатрэбіцца перасадка ў Стамбуле, таму жыхарам гэтых еўрапейскіх краін да восені трэба браць квіток да турэцкага горада, а адтуль ужо да жаданага курорта. Час у дарозе разам з перасадкамі — ад 14 гадзін у адзін бок.
На рэйсах аднаго перавозчыка (але таксама з перасадкай) з Польшчы і Літвы дабрацца ў Тайланд можна будзе толькі з кастрычніка. Тады з Польшчы ў Пхукет і назад можна злятаць за 551 еўра і даражэй, а ў Бангкок і назад — мінімум за 539 еўра. Аналагічныя пералёты з Літвы і назад абыдуцца ў 639 і 631 еўра адпаведна.
Інданезія: дзве ночы ў дарозе, мінімум 10 тысяч рублёў
Амаль 10 тысяч рублёў на дваіх — сама меней такую суму трэба мець, каб паехаць у адпачынак на Балі. Беларускія тураператары прапануюць тыднёвы адпачынак (дзве ночы прыйдзецца правесці ў дарозе). Можна абраць, ці патрэбны сняданак, абед і вячэра — адпаведна, цана будзе расці.
Найдаражэйшы варыянт, які мы знайшлі, каштуе крыху больш як 14 тысяч рублёў — 7 начэй у гатэлі на першай берагавой лініі пясчанага пляжа.
Злётаць у Інданезію з Літвы каштуе мінімум 690 еўра туды і назад, з Польшчы — 643 еўра. Зноў жа, прамых рэйсаў з гэтых краін (як і з Беларусі) не існуе — спатрэбіцца перасадка ў Стамбуле і вытрымка.
Мальдывы: самая дарагая пуцёўка — 16 тысяч на тыдзень
Мінімум 12 тысяч рублёў спатрэбіцца для куплі тыднёвай пуцёўкі на Мальдывы на дваіх. Пражыванне ў чатырохзоркавым гатэлі з крокавай даступнасцю да пляжа і са сняданкамі, прадказальная перасадка ў Стамбуле пры пералёце. Больш як 16 тысяч будзе каштаваць самая дарагая пуцёўка на той жа тэрмін.
Квіткі Варшава — Мальдывы — Варшава стартуюць ад 411 еўра, аналагічныя з Вільні і назад — ад 458 еўра. Зноў жа, чакаюць перасадкі.
Цяпер чытаюць
«Мы яму давяраем». Чаму зніклую Мельнікаву замяніў менавіта экс-вайсковец Пацехін?1
Каментары
В чем смысл такого сравнения?