Беларуская пенсіянерка знялася ў кліпе польскага музыканта ў вобразе вядзьмаркі
Блогерка Аляксандра Ханевіч, добра вядомая беларускай аўдыторыі, з'явілася ў новым музычным кліпе польскага артыста Kolorek. Відэа пад назвай Psyhofan выйшла 7 мая. У ім Аляксандра сыграла каларытную ведзьму-шаптуху, піша Most.
Для 73-гадовай Аляксандры Ханевіч удзел у музычным відэа стаў першым падобным досведам.
Беларуска пазнаёмілася з польскім блогерам падчас сустрэчы ў Беластоку ў 2024 годзе, а ў красавіку 2025 года ён запрасіў яе на першыя здымкі для сваіх сацсетак.
— Спачатку ён прапанаваў мне зняцца ў сацсетках, а праз нейкі час — і ў сваім кліпе. За свае 73 гады ў музычных кліпах я яшчэ не здымалася. Я сыграла вядзьмарку-шаптуху. Здымкі доўжыліся некалькі гадзін, але ў фінальным варыянце мяне відаць толькі некалькі секунд. На здымках было шмат моладзі, цікавы і зусім новы для мяне досвед. Я вельмі задаволеная, — падзялілася Аляксандра.
Сцэны з удзелам Ханевіч здымаліся на Кавалерыйскім рынку ў Беластоку — месцы, знаёмым многім беларусам. Раней сюды актыўна ездзілі за пакупкамі з Гродна, але пасля закрыцця памежных пераходаў у Кузніцы і Баброўніках паток пакупнікоў значна скараціўся.
— Я і сама калісьці ездзіла на гэты рынак з Гродна, а цяпер вось упершыню здымалася тут у кліпе, — кажа Аляксандра.
Kolorek — папулярны польскі блогер і пачатковец-музыкант. Шырокую вядомасць атрымаў дзякуючы відэа-контэнту пра Падляшша, дзе ён жыве і якое актыўна прасоўвае як амбасадар рэгіёна. Музычную кар’еру пачаў у 2025 годзе.
— На рынку нас пазнавалі, падыходзілі, фатаграфавалі, частавалі — асабліва Каларка. Заціскалі. Яго ў Беластоку абажаюць, столькі ўвагі! Сапраўдная зорка, — расказвае Аляксандра.
Цяпер чытаюць
Чаму амерыканцы так ірвуцца на Месяц, што там будуць здабываць? І што да таго беларусам? Тлумачыць беларускі астрафізік1
Каментары