У Францыі праз нашэсце медуз спынілі рэактар на найбуйнейшай АЭС Заходняй Еўропы
На атамнай электрастанцыі Граўлін на поўначы Францыі праз масавае нашэсце медуз спынілі адзін з рэактараў, а магутнасць яшчэ аднаго знізілі. Цяпер у штатным рэжыме працуюць толькі два з шасці рэактараў станцыі, паведамляе France Info.
У кампаніі EDF паведамілі, што ў сераду каля 16‑й гадзіны энергаблок №3 прэвентыўна спынілі пасля таго, як вялікая колькасць медуз зноў трапіла ў сістэмы фільтрацыі на водазаборы з мора.
Гэты рэактар толькі 18 жніўня зноў падключылі да электрасеткі пасля аналагічнага інцыдэнту. Для бяспекі таксама знізілі магутнасць рэактара №2.
Энергаблок №4 застаецца спыненым з 10 жніўня пасля першага масавага наплыву медуз, а рэактар №5 знаходзіцца на планавым тэхнічным абслугоўванні.
Масавыя нашэсці медуз каля АЭС Граўлін ужо фіксавалі ў жніўні 2025 года. Тады ўсе рэактары паступова аднавілі працу на працягу двух тыдняў.
З'яўленне медуз каля паўночнага ўзбярэжжа Францыі з'яўляецца звычайнай сезоннай з'явай, аднак апошнімі гадамі буйныя іх нашэсці летам назіраюцца ўсё часцей.
АЭС Граўлін лічыцца найбуйнейшай атамнай электрастанцыяй у Заходняй Еўропе. У ліпені ў Францыі праз экстрэмальную спёку ўжо даводзілася спыняць тры ядзерныя рэактары.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары