Нямецкага футбаліста атруціў яго аднаклубнік. Магчыма, праз рэўнасць

У сярэдзіне чэрвеня 2025 года гульцы аматарскага футбольнага клуба TuS 1912 Rockenberg, які выступае ў Крайслізе — восьмым дывізіёне нямецкага футбола, адправіліся ў традыцыйную паслясезонную паездку ў Дрэздэн. У праграме былі экскурсіі, вольны час і паход па Саксонскай Швейцарыі. На пятніцу былі запланаваныя культурная праграма і вольны час, на суботу — паход па Саксонскай Швейцарыі з вяртаннем па Эльбе, а ў нядзелю ўсе павінны былі раз'ехацца па дамах.

Сярод удзельнікаў быў 30‑гадовы Філіп Л., які гуляў за каманду з дзяцінства і за гэты час паспеў пабыць і брамнікам, і абаронцам, і нападнікам. Як згадваюць аднаклубнікі, ужо падчас вандроўкі Філіп адчуваў сябе не вельмі добра. Пасля вяртання дамоў у нядзелю яго стан рэзка пагоршыўся. Сям'я выклікала хуткую. Філіпа даставілі ў бальніцу, але выратаваць не змаглі. 16 чэрвеня, за некалькі дзён да свайго 31‑га дня нараджэння, мужчына памёр.

Спачатку смерць не выглядала крымінальнай. У атачэнні Філіпа меркавалі, што мужчына мог атруціцца рыбай, якую еў падчас паездкі. Аднак яе елі і іншыя члены каманды.

Пракуратура пачала высвятляць прычыну смерці. Пасля ўскрыцця спатрэбіліся складаныя таксікалагічныя даследаванні, і праз некалькі месяцаў высветлілася: Філіп памёр ад сэптычнай паліорганнай недастатковасці, выкліканай атручваннем.

Што гэта быў за яд, не паведамляюць дагэтуль. Пракуратура і паліцыя свядома не раскрываюць ні назвы рэчыва, ні таго, якім чынам яно магло трапіць у арганізм Філіпа, ні іншых падрабязнасцяў меркаванага злачынства. Улады тлумачаць гэта інтарэсамі следства: такая інфармацыя можа мець значэнне для далейшага расследавання. Саму справу пракурор называе выключнай, бо забойствы з выкарыстаннем яду ў Германіі здараюцца вельмі рэдка.

Падазраваны — партнёр па камандзе

Паступова ў цэнтры расследавання апынуўся Марыус В. Паліцыя апытала вялікую колькасць сведкаў і асабліва старанна вывучала адносіны паміж ім і загінулым. Урэшце следчыя западозрылі, што Філіпа атруцілі наўмысна, а яд яму мог таемна даць Марыус падчас паездкі ў Дрэздэн.

1 верасня 2026 года, больш чым праз чатырнаццаць месяцаў пасля смерці Філіпа, 35‑гадовага Марыуса затрымалі. Да аперацыі прыцягнулі спецпадраздзяленне паліцыі. Адначасова прайшлі ператрусы дома ў падазраванага і на яго працы.

Футбол для Марыуса, як і для астатніх гульцоў гэтага аматарскага клуба, не быў прафесіяй: ён працаваў у гарадской адміністрацыі Нідаталя і займаўся пытаннямі грантаў і субсідый. Таму паліцыянты прыйшлі і ў ратушу. Былі канфіскаваныя тэлефон, камп'ютар і іншыя носьбіты інфармацыі; следчых таксама цікавілі магчымыя сляды атрутнага рэчыва.

Пасля затрымання суд адправіў Марыуса ў СІЗА. Раней ён не быў судзімы, а цяпер скарыстаўся правам захоўваць маўчанне і паказанняў не дае.

Навошта атручваць?

Галоўнае пытанне ў гэтай гісторыі — навошта Марыусу магло спатрэбіцца забіваць свайго аднаклубніка. Пракуратура гаворыць пра асабістую помсту, але за што менавіта Марыус мог помсціць Філіпу, не раскрывае.

Нямецкія СМІ спрабуюць даведацца магчымую прычыну. Hessenschau са спасылкай на ўласную інфармацыю называе магчымым матывам рэўнасць. У Рокенбургу, як паведамляе мясцовая прэса, ходзяць чуткі, што паміж мужчынамі мог быць канфлікт з-за жанчыны. Афіцыйна гэта не пацверджана.

Дадатковую інтрыгу стварае тое, што на момант арышту Марыус рыхтаваўся да вясельнай урачыстасці, якая, паводле RTL, была запланаваная на сярэдзіну верасня. Пры гэтым няма звестак, што жанчына, з якой мог быць звязаны меркаваны канфлікт, была яго нявестай.

Цяпер следчыя вывучаюць канфіскаваныя электронныя носьбіты і плануюць новыя допыты сведкаў, каб высветліць усе абставіны і матыў меркаванага злачынства. Пракурор падкрэслівае, што расследаванне пакуль «у самым пачатку».

Марыус В. застаецца падазраваным. Калі справа дойдзе да абвінавачання ў забойстве і суд прызнае яго вінаватым, мужчыну можа пагражаць пажыццёвае зняволенне.

• 0
• 0
• 0
• 0
• 0
• 0
• 0
• 0