Музыка Фёдар Жывалеўскі, які сядзеў на завулку Акрэсціна разам з Ігарам Банцарам, расказаў, што вядома пра затрыманне апошняга, піша «Свабода».
Фёдар Жывалеўскі — лідар рок-гурту «Голая Манашка» і каардынатар моладзевага праекту «СупКультУра».
З яго словаў, Банцару далі 15 дзён адміністрацыйнага арышту, за што — невядома.
«Яму далі 15 сутак, і ён лёг і спаў на стале, пакуль усе нерваваліся, каму што дадуць», — кажа Фёдар.
Ці выпусцяць музыку праз 15 дзён, пакуль няясна.
«Ведаю, што яму 18 адміністрацыйных артыкулаў павесілі і прывезлі з Горадні», — расказвае Жывалеўскі.
Што стала прычынай для гэтага, таксама невядома.
«Ён мне расказаў, што хоча жыць тут і жыць нармальна, але яму ясна даюць зразумець, каб ён з'ехаў. Ён не жадае нікуды ехаць… Мне падалося, што ён ужо без надзеі на тое, што нешта зменіцца… Расказаў, што яго мара — займацца музыкай», — успамінае размовы з Банцарам Фёдар.
Ігара Банцара затрымалі 4 жніўня ў гродзенскай кватэры. Са словаў сваякоў, у той момант ён быў дома адзін. Людзі ў цывільным і ў масках выламалі металічныя дзверы ў кватэру і вывезлі музыку ў Мінск.
Ігар Банцар ужо адсядзеў тэрмін пасля пратэстаў 2020 года. Яго судзілі за хуліганства, бо ён у верасні 2020-га станцаваў без штаноў перад міліцэйскай машынай. Асудзілі на паўтара года «хіміі». Падчас суда Банцар трымаў некалькі галадовак, у тым ліку сухую цягам 16 дзён, і на той момант гэта быў беларускі рэкорд.
Банцару 42 гады, ён мае траіх дзяцей. Ігар — вядомы гродзенскі музыкант. Пасля вызвалення сёлета ён адмовіўся з'язджаць з Беларусі.
«Я настолькі люблю Беларусь, што гатовы тут сядзець у турме», — тлумачыў ён.
-
Расіяніну, які п'яным пабіўся з ахоўнікамі мінскага метро, вынеслі лагодны прысуд
-
Латушка пра магчымасць вайны ў Беларусі: Гэта ж вар'яцтва, не ўяўляю, як крамлёўская прапаганда будзе тлумачыць гэта
-
«Да канца года, спадзяюся, зможам рэалізаваць адну-дзве рэчы». Бабарыка — пра свой новы праект і беларускую мову
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»37
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары