Прэзідэнт Украіны ў традыцыйным відэазвароце адрэагаваў на рэзанансныя словы Папы Францішка пра тое, што «Украіна павінна мець мужнасць падняць белы сцяг і дамовіцца з Расіяй пра спыненне вайны».
«Расійскія забойцы і каты не ідуць далей па Еўропе толькі таму, што іх стрымліваюць украінцы і ўкраінкі са зброяй у руках і пад сіне-жоўтым сцягам. Ва Украіне калісьці было шмат белых сцен дамоў і цэркваў, якія цяпер спаленыя і разбітыя расійскімі снарадамі. І гэта вельмі красамоўна гаворыць пра тое, хто менавіта павінен спыніцца, каб спыніць вайну. Той, хто абараняе жыццё і людзей, выконвае самую пачэсную місію, якую толькі можна выканаць перад абліччам такога бесчалавечнага ўварвання…
Калі расійскае зло пачало гэтую вайну 24 лютага, усе ўкраінцы ўсталі на абарону. Хрысціяне, мусульмане, яўрэі — усе. І я дзякую кожнаму ўкраінскаму капелану, які з войскам, у Сілах абароны. Там, на перадавой. Бароняць жыццё і чалавецтва. Падтрымліваюць малітвай, размовай і справай. Вось што такое царква — з людзьмі.
А не за дзве з паловай тысячы кіламетраў — недзе там займацца віртуальным пасрэдніцтвам паміж тымі, хто хоча жыць, і тымі, хто хоча цябе знішчыць. Я дзякую ўсім, хто ва Украіне і з Украінай робіць усё, каб выратаваць жыцці, я дзякую ўсім, хто дапамагае і хто сапраўды побач — дзеяннямі і малітвамі», — сказаў Зяленскі.
У інтэрв'ю, якое было запісанае ў лютым, але было апублікаване цяпер, Францішак заявіў, што Украіна павінна мець адвагу падняць белы сцяг і пачаць перамовы з Расіяй.
Гэта абурыла ўкраінскі бок і іншых замежных палітыкаў. Ватыкану пазней давялося тлумачыць словы Папы.
Каментары