Крысціне Арбакайце забаранілі ўезд у Латвію праз пагрозу нацыянальнай бяспецы
Латвійскія ўлады ўнеслі расійска-літоўскую спявачку Крысціну Арбакайце ў спіс непажаданых асоб. Такое рашэнне прынятае па рэкамендацыі службы дзяржаўнай бяспекі. Рашэнне звязана з выступамі артысткі ў акупаваным Крыме і ўдзелам у расійскіх прапагандысцкіх мерапрыемствах, паведамляе LTV.
Міністр унутраных спраў Латвіі Рыхард Казлаўскіс пацвердзіў, што Крысціна Арбакайце трапіла ў «чорны спіс» асобе, якім забаронены ўезд у Латвію. Такое рашэнне прынятае на падставе ацэнкі Службы дзяржаўнай бяспекі Латвіі.
Там патлумачылі, што спявачка пасля акупацыі паўвострава Крым выступала там з канцэртамі, а таксама ўдзельнічала ў праграмах, якія расійскія ўлады выкарыстоўвалі ў прапагандысцкіх мэтах. Акрамя таго, паводле СДБ, артыстка нібыта падтрымлівае агрэсію Расіі супраць Украіны.
«Мы як дзяржава падтрымліваем Украіну і не можам прыняць, каб асобы, якія адкрыта дэманструюць падтрымку агрэсару і парушальніку міжнароднага права, вольна выступалі ў Латвіі», — падкрэсліў Казлаўскіс.
У сувязі з гэтым у краіне, хутчэй за ўсё, будзе скасаваны летні канцэрт Арбакайце, на які ўжо вёўся продаж квіткоў.
Летась латвійскі спіс непажаданых асоб быў папоўнены на 480 прозвішчаў. Улады заяўляюць, што падобныя рашэнні будуць прымацца і надалей дзеля абароны нацыянальнай бяспекі.
У Літве, грамадзянкай якой з'яўляецца Крысціна Арбакайце, таксама выклікаў хвалю абурэння ў сацыяльных сетках канцэрт Крысціны Арбакайце, запланаваны на 31 мая ў Вільні. Карыстальнікі выказваюць незадаволенасць тым, што ў Літву запрашаюць артыстку, якая атрымала званне «заслужанай артысткі Расійскай Федэрацыі» і не асудзіла агрэсію Расіі супраць Украіны.
У той жа час у самой Расіі таксама адмяняюць канцэрты Арбакайце. Прычынамі там называюць, што спявачка не выказала сваёй пазіцыі аб вайне ва Украіне, нібыта «фінансавала УСУ» і атрымала замежнае грамадзянства, а ў Расію прыехала толькі для заробку грошай. Да таго там яе цкуюць як дачку «замежнага агента» (Ала Пугачова не прызнаная замежным агентам, ім прызнаны яе муж — Максім Галкін).
Цяпер чытаюць
Статкевіч: Калі зноў пачнуцца масавыя пратэсты, яны ўжо не будуць такімі мірнымі, як у 2020‑м. А ЕС правільна перастаў верыць казкам Лукашэнкі17
Статкевіч: Калі зноў пачнуцца масавыя пратэсты, яны ўжо не будуць такімі мірнымі, як у 2020‑м. А ЕС правільна перастаў верыць казкам Лукашэнкі
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?11
Каментары