У Варшаве падчас фестывалю Pradmova адбыўся ўстаноўчы сход Асацыяцыі беларускіх выдаўцоў. У яе ўвайшлі 11 сузаснавальнікаў, якія прадстаўляюць розныя выдавецтвы або ініцыятывы. Было абрана кіраўніцтва і сфарміравана рэвізійная камісія, паведамляе Reform.news.
Цяпер асацыяцыя плануе зарэгістравацца паводле польскага заканадаўства і на працягу наступнага года рэалізаваць некалькі праектаў для падтрымкі выдавецкай супольнасці.
Старшыня навастворанай асацыяцыі Валянціна Андрэева, рэдактарка кракаўскага беларускага выдавецтва Gutenberg, адзначыла, што ідэя прафесійнага аб’яднання незалежных выдаўцоў існавала даўно, але рэалізаваць яе атрымалася толькі цяпер, у эміграцыі. Яна патлумачыла, што сумесная праца і каардынацыя неабходныя, бо нашы выдаўцы не канкурэнты, а супольна працуюць дзеля забеспячэння патрэб беларускага грамадства ў розных кнігах.
Сярод асноўных задач асацыяцыі — удзел у міжнародных кніжных кірмашах, павышэнне бачнасці беларускай кнігі за мяжой, прасоўванне прадукцыі ў СМІ, а таксама арганізацыя тэматычных і рэгулярных мерапрыемстваў для чытачоў і прафесіяналаў.
Асацыяцыя будзе дзейнічаць як некамерцыйнае аб’яднанне прафесіяналаў, прадстаўляць выдаўцоў у кантактах з аўтарамі, агенцтвамі і інстытутамі, а таксама шукаць падтрымку і выказваць сумесную пазіцыю па важных пытаннях.
Нягледзячы на рэгістрацыю ў Польшчы, да асацыяцыі могуць далучыцца выдаўцы з любой краіны.
Каментары