Інфармацыя пра справаздачы Крамлю яшчэ больш зменшыла перадвыбарчыя рэйтынгі партыі Орбана
Шанцы партыі Віктара Орбана на парламенцкіх выбарах у Венгрыі, якія маюць адбыцца 12 красавіка, яшчэ больш упалі на фоне скандалу, звязанага з выяўленымі рэгулярнымі «справаздачамі» венгерскіх лідараў перад Крамлём. Петэр Мадзьяр, партыя якога ўзначальвае перадвыбарчую гонку, заклікае выбаршчыкаў пакласці канец 16‑гадоваму кіраванню Орбана, якое прывяло да застою ў эканоміцы, і даць апазіцыі мандат на разбурэнне пабудаванай прэм'ерам сістэмы «неліберальнай дэмакратыі», піша The Moscow Times.
Згодна са свежым апытаннем кампаніі 21 Kutatokozpont, партыю Мадзьяра «Ціса» цяпер падтрымліваюць 56% выбаршчыкаў, якія вызначыліся з выбарам, а партыю Орбана «Фідэс» — 37%, паведамляе Bloomberg. Тры тыдні таму суадносіны складалі 53% да 39%. Гэтыя даныя падобныя да вынікаў, апублікаваных на мінулым тыдні аўтарытэтнай сацыялагічнай службай Median, якая зафіксавала перавагу «Цісы» на 23 працэнтныя пункты.
Зводны вынік апытанняў на 28 сакавіка, які публікуе Politico, дае 50% супраць 39%: хоць у ім «Ціса» лідзіруе ўжо больш за год, у канцы сакавіка яе падтрымка стала расці і дасягнула 50‑працэнтнай адзнакі.
Мадзьяр заклікае выбаршчыкаў забяспечыць яго партыі супербольшасць у парламенце, каб не толькі адхіліць Орбана з пасады прэм'ера, але і разбурыць усю сістэму, у якой той у значнай ступені паставіў пад кантроль суды, СМІ і многія дзяржаўныя інстытуты. Апытанне Median паказвае, што «Ціса» зможа атрымаць дзве траціны месцаў у парламенце, апытанне ж Kutatokozpont дае ёй крыху менш месцаў.
Пры наяўнасці супербольшасці ў парламенце «Цісе» не трэба будзе шукаць падтрымкі ў іншых дэпутатаў, каб, як абяцаў Мадзьяр, адхіліць стаўленікаў Орбана — вышэйшых суддзяў і генеральнага пракурора, а таксама, магчыма, прэзідэнта.
Орбан пабудаваў сваю кампанію на абвінавачваннях на адрас Украіны і Еўрасаюза, якія нібыта пазбаўляюць Венгрыю грошай і бяспекі. Пры гэтым ён пастаянна блакуе ініцыятывы ЕС па падтрымцы Украіны і санкцыях супраць Расіі. У апошнія тыдні высветлілася, што міністр замежных спраў Венгрыі Петэр Сіярта рэгулярна стэлефаноўваўся з кіраўніком МЗС РФ Сяргеем Лаўровым і расказваў яму, што абмяркоўвалася на пасяджэннях міністраў краін ЕС. Часам ён гэта рабіў проста падчас перапынкаў у такіх пасяджэннях.
Сіярта таксама прасіў расіян падрыхтаваць для яго інфармацыю, якую ён мог бы выкарыстоўваць для блакіроўкі антырасійскіх санкцый. У Маскве, у сваю чаргу, прасілі яго пралабіяваць зняцце санкцый — у прыватнасці, з блізкага да Пуціна мільярдэра Алішэра Усманава і яго сваякоў.
За час вайны ва Украіне Сіярта 22 разы сустракаўся з расійскімі лідарамі, неаднойчы ездзіў у Маскву і Орбан. Згодна з запісамі тэлефонных размоў, якія трапілі ў прэсу, венгерскі міністр таксама абмяркоўваў з намеснікам міністра энергетыкі Расіі Паўлам Сарокіным блакаванне санкцый ЕС супраць расійскага ценявога флоту.
Апублікавалі праслухоўку тэлефонных размоў Лаўрова і Сіярта
ЕС адхіліў Венгрыю ад унутраных перамоў і сакрэтнай інфармацыі з-за боязі ўцечак у Расію
Орбан на перадвыбарчым мітынгу сарваўся і накрычаў на пратэстоўцаў
Джэй Дзі Вэнс наведае Венгрыю перад парламенцкімі выбарамі
«Сапраўдны сябра і баец». Трамп падтрымаў Орбана перад выбарамі ў Венгрыі
СМІ расказалі пра расійскі сцэнар імітацыі замаху на Віктара Орбана перад выбарамі
Каментары