У «Мінсктрансе» расказалі, чаму ў Мінску аўтобусы і тралейбусы спазняюцца і знікаюць з маршрутаў
У сацыяльных сетках пасажыры расказалі пра праблемы з некалькімі маршрутамі грамадскага транспарту.
Адна з мінчанак звярнула ўвагу на працу аўтобуса №175С, а таксама тралейбусаў №29 і №61. Паводле яе слоў, транспарт не заўсёды прыходзіць у пазначаны час, пры гэтым пасажыры не атрымліваюць своечасовай інфармацыі пра затрымкі, піша «Мінская праўда».
Яшчэ адна жыхарка сталіцы паскардзілася на аўтобус №130. Яна расказала, што маршрут, паводле яе назіранняў, некалькі разоў на тыдзень можа не прыходзіць раніцай і ўвечары.
На прадпрыемстве патлумачылі, што збоі ў графіку руху наземнага транспарту ў гадзіны пік могуць быць звязаныя са складанай дарожнай сітуацыяй.
Акрамя таго, прычынай затрымак становяцца эксплуатацыйныя праблемы непасрэдна на лініі.
Пры гэтым пасажыры могуць адсочваць рух транспарту з дапамогай электронных табло на прыпынках і сэрвісу «Віртуальнае табло».
Што азначае «ЗТ» на электронным табло
У «Мінсктрансе» патлумачылі, што сістэма разлічвае меркаваны час прыбыцця транспарту на прыпынак. Калі рух па маршруце парушаецца, праграмна-апаратны комплекс пералічвае час чакання пасля таго, як транспарт праходзіць папярэднія прыпынкі.
Аднак дакладна вызначыць, колькі аўтобус ці тралейбус, напрыклад, прастаіць у дарожным заторы, сістэма пакуль не можа.
У такіх выпадках на электронным табло побач з нумарам маршруту з'яўляецца пазначэнне «ЗТ» — «затрымка транспарту».
Такім чынам, калі аўтобус ці тралейбус не прыходзіць у пазначаны час, пасажырам рэкамендуюць арыентавацца не толькі на звычайны расклад, але і на даныя электроннага табло або «Віртуальнага табло».
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5757
Каментары