U kryminalnym pravie adnaho pryznańnia niedastatkova dla abvinavaŭčaha prysudu, kažuć jurysty.
Juryst pravaabarončaha centra «Viasna» Pavieł Sapiełka miarkuje, što dla suda abjektyŭnych dokazaŭ viny Juryja Haraŭskaha było mienš, čym nieabchodna dla «taho, kab pa vysokich standartach spraviadlivaha pravasudździa vynieści abvinavaŭčy prysud».
Takoj ža pazicyi trymajecca i advakat, siabra Češskaj pałaty advakataŭ Aleś Michalevič. Jon adznačaje, što «ŭ kryminalnym pravie dokazy pavinny być pa-za ŭsialakim sumnievam». Adnaho pryznańnia čałavieka dla abvinavaŭčaha prysudu niedastatkova.
«U šviejcarskaha suda byli davoli abmiežavanyja mahčymaści, kab vyklikać inšych śviedak. I naohuł pravieści praces pa kryminalnaj spravie ŭ tym farmacie, jakim jon musiŭ być», — davodzić Aleś Michalevič.
Na jaho pohlad, kali b była mocnaja abvinavaŭčaja baza, to abvinavaŭčy prysud moh by być.
Dalejšyja kroki pa spravie Haraŭskaha ŭ Šviejcaryi buduć zaležać ad padrabiaznaj matyviroŭki prysudu, praciahvaje Pavieł Sapiełka.
Pavieł Sapiełka kaža, što apraŭdalny vyrak prahnazavaŭsia, ale jon nie najlepšy varyjant jak dla paciarpiełych, tak i ŭ cełym dla ŭniviersalnaj jurysdykcyi pa abvinavačańniach suprać čałaviečnaści i mižnarodnaha prava.
Pravaabaronca ličyć, što abvinavaŭčy prysud moh paćvierdzić šerah abstavinaŭ pa spravie ab źniknieńni palitykaŭ Hančara, Zacharanki i biznesoŭca Krasoŭskaha. Apraŭdalny ž prysud moža ŭskładnić rasśledavańni takich spraŭ u inšych jeŭrapiejskich krainach.
Na jaho dumku, apraŭdalny prysud budzie stavić bolš vysokuju płanku dla ŭład jeŭrapiejskich krain u rasśledavańni takich spraŭ.
«Taki prysud budzie lišni raz nahadvać, što luboje abvinavačańnie pavinna być paćvierdžana sukupnaściu pierakanaŭčych dokazaŭ, i, mahčyma, niekatoryja prakuratury ŭstrymajucca vystaŭlać abvinavačańni, pradbačačy praźmierna vysoki abjom pracy pa takich spravach. Ale ŭ cełym heta nie pavinna stać pieraškodaj dla pieraśledu inšych padazravanych i abvinavačvanych u złačynstvach pa mižnarodnym pravie», — davodzić Pavieł Sapiełka.
Pavieł Sapiełka nie hatovy kazać, što šviejcarski sud ustanaviŭ datyčnaść režymu Łukašenki da vykradańnia palitykaŭ i biznesoŭca Krasoŭskaha, bo sam nie prysutničaŭ na pracesie.
«U cełym dla pravaabarončaj supolnaści i tych, chto viedaje situacyju z hetaj spravaj u Biełarusi, absalutna vidavočnaja vina biełaruskaj ułady, i jana pavinna być zamacavanaja ŭ prysudzie ci biełaruskaha, ci jeŭrapiejskaha suda. Jana ŭrešcie znojdzie svajo adlustravańnie ŭ prysudzie. Hety praces moh stać vialikim krokam u hetym napramku. Ale nie staŭ», — adznačaje Pavieł Sapiełka.
Aleś Michalevič uściešany, što ŭniviersalnaja jurysdykcyja pačała pracavać. Sudy ŭ inšych krainach zaraz mohuć bracca za spravy, kali jany źviazanyja z katavańniami, złačynstvami suprać čałaviečnaści.
«Ja duža rady, što hety praces pačaŭsia, i jon sam pa sabie ŭvajšoŭ u historyju Biełarusi i suśvietnaj jurysprudencyi», — adznačaje Michalevič.
Juryj Haraŭski sam pryznaŭsia va ŭdziele ŭ vykradańni i zabojstvie palityčnych apanientaŭ Łukašenki ŭ 90-ja padčas intervju «Dojče Viele» ŭ 2019 hodzie. Byłoha śpiecnazaŭca šviejcarski sud vinavaciŭ u hvałtoŭnym źniknieńni ludziej i ŭviadzieńni pravasudździa ŭ zman.
Haraŭskamu inkryminavali vykradańnie eks-ministra MUS Biełarusi Juryja Zacharanki, eks-staršyni CVK Viktara Hančara i biznesoŭca Anatola Krasoŭskaha. Prakuror prasiŭ dla jaho 3 hady pazbaŭleńnia voli.
Ale sud apraŭdaŭ Juryja Haraŭskaha pa abodvuch vystaŭlenych jamu abvinavačańniach — hvałtoŭnym źniknieńni ludziej i ŭviadzieńni pravasudździa ŭ zman.
Tłumačačy prysud, sudździa zajaviŭ, što heta asablivy vypadak, u jaki «ŭmiašanaja ŭłada, i jana adkaznaja za hvałtoŭnyja fakty źniknieńnia». «Hetyja fakty nie pavinny vyklikać sumnieńniaŭ».
Razam z tym sud paličyŭ, što niekatoryja z pakazańniaŭ Haraŭski prydumaŭ, tamu jon pryjšoŭ da vysnovy, što abvinavačvany, mahčyma, słužyŭ u SACHRy, ale jahonaja rola ŭ vykradańniach zastajecca niezrazumiełaj.
Pradstaŭnik Aleny Zacharanka i Valeryi Krasoŭskaj u šviejcarskim sudzie Sieviaryn Valc paviedamiŭ, što abaviazkova budzie abskardžvać vyniesieny prysud.
«Naša Niva» — bastyjon biełaruščyny
PADTRYMAĆHladzicie taksama:
«A kali ŭžo i nas zabuduć, jak 1996-y ci 2010-y?»
Siońnia spaŭniajecca 23 hady, jak źnik Juryj Zacharanka
«Jany stralali ŭ śpinu»: dačka Zacharanki sustrełasia z eks-bajcom śpiecnazu Juryjem Haraŭskim
Illu Dubskaha ŭ kałonii prymusili samomu sabie lazom zrezać tatuiroŭku z Pahoniaj12
Kamientary