«Будынак з гадзіннікам» на плошчы Якуба Коласа хочуць перарабіць у шматфункцыянальны комплекс з офісамі і казіно
У Мінску будынак былога паліграфічнага камбіната на вул. Краснай, 23, вядомы як «будынак з гадзіннікам», збіраюцца перарабіць у шматфункцыянальны цэнтр з офісамі і казіно. Як піша Onliner, з 4 жніўня да 3 верасня пройдзе грамадскае абмеркаванне справаздачы аб ацэнцы ўздзеяння на навакольнае асяроддзе.
Праект рэалізуе прадпрыемства «Прынцэс Плаза Цэнтр». Яно збіраецца рэканструяваць будынак 1950‑х гадоў, які ўваходзіць у склад гісторыка‑культурнай каштоўнасці трэцяй катэгорыі. Ідзе гаворка аб адным з «будынкаў з гадзіннікам», якія размешчаны на плошчы Якуба Коласа. Канкрэтна — пра той, што знаходзіцца злева. Паводле даных аўтараў праекта, цяпер ён не выкарыстоўваецца.
Праектам прадугледжана арганізацыя гандлёвых памяшканняў плошчай 4,4 тыс. квадратных метраў, а таксама офісных — на 7,8 тыс. «квадратаў». Акрамя таго, тут збіраюцца размясціць банк, фітнес-клуб, кавярню на 50 пасадачных месцаў, казіно з разлікам на адначасовае знаходжанне 100 наведвальнікаў і падземную аўтапляцоўку на 445 машына-месцаў.
Паводле інфармацыі Onliner, на грамадскае абмеркаванне плануецца вынесці тры варыянты. Адзін з іх прадугледжвае ўзвядзенне цэнтра з захаваннем аблічча будынка. Па задумцы аўтараў праекта, рэканструкцыя дазволіць стварыць новыя рабочыя месцы, палепшыць знешні выгляд будынка і стварыць камфортныя плыні руху транспарту і пешаходаў.
Па другім варыянце будынак застануць у цяперашнім стане. Гэта, на думку распрацоўшчыкаў, азначае адмову ад развіцця тэрыторыі і страты архітэктурнага патэнцыялу аб’екта. У апошнім варыянце праект могуць перанесці ў іншае месца. Якое — у праекце не раскрываецца, бо рэканструкцыю плануецца выканаць менавіта на гэтым участку.
Цяпер чытаюць
У Пецярбургу затрымалі коміка з Пінска. Ён тры гады хаваўся пасля прысуду за жарт пра міліцыянтку1
Каментары