«Норм ці стром працаваць у калгасе?» Беларускія аграрыі адказалі на няпростыя пытанні пра сваё жыццё
Беларускі блогер Дзяніс Трафімчык, аўтар канала ў тыктоку «Аграблог», зладзіў апытанне работнікам сельскай гаспадаркі ў духу трэнду «Норм альбо стром?» і павесяліў карыстальнікаў, заўважыла «Люстэрка».
У вірусным трэндзе «Норм ці стром?» аўтары ацэньваюць розныя сітуацыі як «норм» (нешта добрае, прымальнае, дапушчальнае) або «стром» (нешта непажаданае ці дзіўнае). Відэа часта здымаюць у жартоўнай ці правакацыйнай манеры, каб уцягнуць гледачоў у абмеркаванне.
У такі трэнд уключыліся і беларускія работнікі сельскай гаспадаркі. Па некаторых пунктах думкі ў іх разышліся: напрыклад, ці «норм» працаваць у святы альбо гатаваць замест жонкі.
Затое на пытанне аб расцэнках аплаты працы ў калгасе абодва мужчыны аднагалосна адказалі: «Стромна, стромна, стромна».
Таксама, на іх думку, «стром» — гэта пахмяліцца пасля Вялікадня, а вось здымаць ролікі ў калгасе і называць дырэктара гаспадаркі на вы — «норм».
Аднак пытанне, ці нармальна «ўзяць пару літраў саляркі» для сваіх патрэб, паставіў аграрыяў у тупік.
— Палка аб двух канцах, — задумаўся адзін з мужчын.
У рэшце рэшт яны ўсё ж прыйшлі да меркавання, што красці паліва — «стром». Праўда, некаторыя карыстальнікі ў каментарах засумняваліся ў іх шчырасці.
А на пытанне, ці «норм» працаваць у калгасе, у аднаго з работнікаў і зусім вырвалася нецэнзурнае слова.
Каментары